اشتدّي يا أزمة ... تهزلي يا صحافة !

رحم الله جبران اندراوس التويني (جبران الجدّ) الذي سقط شهيداً للصحافة الحرّة وهو يدافع عن قضية فلسطين وقضايا العرب على احد المنابر . ورحم الله غسان جبران تويني الذي صرخ "أتركوا شعبي يعيش" في الامم المتحدة وصاغ القرار 425 الذي كان أب القرارات لتحرير لبنان من الاحتلال... ورحم الله الشهيد جبران غسان تويني الذي قتلته يد الغدر والاجرام لانه تحدّى الجبناء الذين يصفوّن الجسد ويخافون الكلمة ... ورحم الله الشهيد سمير قصير الذي دفع ثمن اندفاعه لربيع عربي ظلّ من بعد رحيله متأرجحاً بين "الاحباط ليس قدراً وبيان الحلم".... 

 

ورحم الله أيضاً سليم اللوزي وميشيل أبو جودة وفؤاد حداد (أبو الحنّ) وكامل مروّه وسليمان أبوزيد وقبلهم رحم الله شهداء الحكم العثماني الذين علّقت مشانقهم في ساحة الشهداء ومنهم الأخوين خازن والشيخ أحمد حسن طبارة وسعيد فاضل عقل وعمر حمد والامير عارف الشهاب وعبد الغني العريسي وباترو باولي وجورجي حداد .... ولائحة الشرف تطول لتضم قافلة من الصحافيين الأحرار الذين ماتوا من أجل قضية وهدف ومن أجل وطن عزيز كريم شريف لبنان.

هذه الصحافة القديمة العريقة هل ماتت مع أصحابها ؟ اللهم ما نقرأه اليوم لا يشبه بشيء ما أورثنا إياه هؤلاء العظماء في مهنة المتاعب التي حولّها البعض اليوم الى مهنة ... مجرّد مهنة ... مجردّة من الرسالة ولا تجلب سوى المتاعب (يتبع)

ليش في أحلى من لبنان ؟

بنص ساعة منعمل سكي ومنسبح ! أوف !!! مش عم صدّق شو هالانجاز!
بنص ساعة فيك تبرم باريس ونيو يورك ولندن بالميترو يا حبيبي !! وين بعدكن ؟؟!

بيقولو ما تجو ع لبنان ... ليش في أحلى من لبنان ؟
أسخف اعلان سياحي للبنان عنوانو العريض : التكاذب المشترك تماماً متل كذبة "التعايش المشترك" ! بيكفيّ مسخرة !

ع شو بدن يجو ع لبنان ؟ تيشوفو التطرف والعنف والخطف وين صار ببلدنا ؟؟؟ ويعيشوا تجربة الاحتجاز وطلب الفدية والابتزاز وربما قطع الأعضاء ؟؟

وبين مزدوجين : (و ع سيرة الأعضاء شو يعرفكن ما يصير في سوق سودا للأعضاء المبتورة بالمعاملتين بعد السيطرة عليها من قبل جماعات تكفيرية تحرّم التواصل الجسدي خارج اطار الشرع ) ...

ع شو بدن يجو ع لبنان ؟ ليقضّوا نص نهار بالسيارة من بيروت لجونية أو عالشمال ؟ أو من بيروت لصيدا والجنوب ؟ مع احتمال قطع طرق وحرق دواليب ؟

ع شو ولشو بدن يجو ع لبنان ؟ كرمال يلتعن نفسن بعجقة السير والفوضى بالطريق مع تجربة استثنائية لحيوانات تتسابق في باصات الركاب : "لا تلحقني مخطوبة" تتسابق على زبون الف ليرة ومستعدين يقتلوا قتيل كرمالو ؟ ( و ع فكرة نصّن مسلحّين) ...

ع شو بدن يجو ع لبنان ؟ ع أمن المطار وطريق المطار الممسوك ؟ ع مفاوضات بتصير بين عشاير على مخطوفين بعيد عن الدولة ومنطق الدولة وأمن الدولة ؟

ع شو بدن يجو ع لبنان ؟؟ ليموتو بشي قنبلة موقوتة تحت سيارة مفخخة من شخص موتور ومهووس دينياً وجنسياً وحاقد ع شعب أو طايفة بأكملها ؟

ع شو بدن يجو ع لبنان ؟ ع شرطة سياحية فيها 16 عنصر ؟؟

ع شو ولشو بدن يجو ؟؟ لألف وسبب وسبب ...
بالمختصر : لبنان أحلى بلد ... بالكتب بالتاريخ بالفن والجغرافيا وبذاكرة اللبنانييّ من الاستقلال الى قبل حرب السبعينات وبعض أمجاد الرحابنة وصباح ووديع الصافي ...وبس !

 
أما عن مصيرنا نحن الشعب العادي ؟ فالله يرحمنا ويرحم لبنان وما تبقى من أيام قليلة من عمر الدولة ... شبه الدولة - السراب.

 
على أمل أن يعود لبنان الذي كان ولا نعرف كيف ومتى سيعود ... لكن ما أضيق العيش لولا فسحة الأمل

فيليب أز