ليش في أحلى من لبنان ؟

بنص ساعة منعمل سكي ومنسبح ! أوف !!! مش عم صدّق شو هالانجاز!
بنص ساعة فيك تبرم باريس ونيو يورك ولندن بالميترو يا حبيبي !! وين بعدكن ؟؟!

بيقولو ما تجو ع لبنان ... ليش في أحلى من لبنان ؟
أسخف اعلان سياحي للبنان عنوانو العريض : التكاذب المشترك تماماً متل كذبة "التعايش المشترك" ! بيكفيّ مسخرة !

ع شو بدن يجو ع لبنان ؟ تيشوفو التطرف والعنف والخطف وين صار ببلدنا ؟؟؟ ويعيشوا تجربة الاحتجاز وطلب الفدية والابتزاز وربما قطع الأعضاء ؟؟

وبين مزدوجين : (و ع سيرة الأعضاء شو يعرفكن ما يصير في سوق سودا للأعضاء المبتورة بالمعاملتين بعد السيطرة عليها من قبل جماعات تكفيرية تحرّم التواصل الجسدي خارج اطار الشرع ) ...

ع شو بدن يجو ع لبنان ؟ ليقضّوا نص نهار بالسيارة من بيروت لجونية أو عالشمال ؟ أو من بيروت لصيدا والجنوب ؟ مع احتمال قطع طرق وحرق دواليب ؟

ع شو ولشو بدن يجو ع لبنان ؟ كرمال يلتعن نفسن بعجقة السير والفوضى بالطريق مع تجربة استثنائية لحيوانات تتسابق في باصات الركاب : "لا تلحقني مخطوبة" تتسابق على زبون الف ليرة ومستعدين يقتلوا قتيل كرمالو ؟ ( و ع فكرة نصّن مسلحّين) ...

ع شو بدن يجو ع لبنان ؟ ع أمن المطار وطريق المطار الممسوك ؟ ع مفاوضات بتصير بين عشاير على مخطوفين بعيد عن الدولة ومنطق الدولة وأمن الدولة ؟

ع شو بدن يجو ع لبنان ؟؟ ليموتو بشي قنبلة موقوتة تحت سيارة مفخخة من شخص موتور ومهووس دينياً وجنسياً وحاقد ع شعب أو طايفة بأكملها ؟

ع شو بدن يجو ع لبنان ؟ ع شرطة سياحية فيها 16 عنصر ؟؟

ع شو ولشو بدن يجو ؟؟ لألف وسبب وسبب ...
بالمختصر : لبنان أحلى بلد ... بالكتب بالتاريخ بالفن والجغرافيا وبذاكرة اللبنانييّ من الاستقلال الى قبل حرب السبعينات وبعض أمجاد الرحابنة وصباح ووديع الصافي ...وبس !

 
أما عن مصيرنا نحن الشعب العادي ؟ فالله يرحمنا ويرحم لبنان وما تبقى من أيام قليلة من عمر الدولة ... شبه الدولة - السراب.

 
على أمل أن يعود لبنان الذي كان ولا نعرف كيف ومتى سيعود ... لكن ما أضيق العيش لولا فسحة الأمل

فيليب أز