Sunday, February 2, 2014

عن بلدي ما عاد بلدي


بصراحة ومن الآخر ... ولا مرة كنت محبط متل ما عم حسّ هالإيام بلبنان. بلدنا عم يتدّمر وما حدا فارقة معو. شعبنا عم يموت اشلاء عالطرقات والزعما عم يركضوا عالتسويات وتوزيع الحصص والحقائب. شو نفع يا معالي الوزير عالوزارة تفوت ان كان الانسان ببلدك عم يموت ؟ شو عملتو بشبابنا ؟ سرقتوا عمر اهلنا بالحرب الاهلية وعمر جدودنا بالحرب العالمية وعمرنا عم يروح بحرب الارهابييّ !! يا اهل الخير بلبنان وينكن ؟ هيداالوطن ما عاد الو وجود غير بكتب التاريخ والحنين ونوستالجيا الرحابنة ومسرحيات فيروز. هيدا الوطن قصيدة مخباية بجارور سعيد عقل وخربشات ع ورق طيرّهم هوا صنيّن بعرزال مخايل نعيمة.



 لولا جبران خليل جبران ما هاجر كان ضل نبي منسي ببلدو. كان رجم لافكارو وكان انتهى متل ما كل شب عم ينتهي ويحرق حالو بوطن مش سئلان عن اولادو ... اصحابي صاروا بكل بلد ميلة مجمعيّن والعيلة صارت حلم تنجمع .... يا وطن مش قادر اشتري فيك مرقد عنزة ... نيال اللي عاشوا بأرضك من زمان ... ع ايام ما كان لبنان ارض القداسة مش منبع للشر ومقلع الزعران. يا ارض اللي خلقت فيكي مش قادر سامحك ع هالغلطة. يمكن الناس شايفين كل شي طبيعي يمكن انا عم بحلم بوطن افضل .. عم هلوس ... رح اسكت ونام ع امل اوعى من الكابوس شي يوم وشوفك وطن وصير احلمك يا حلم يا لبنان انت الهدايا بالعلب ... علب مفخخة.
فيليب ابوزيد

من لبنان الكبير الى لبنان الجديد

  كتب الكثير في المئوية الاولى للبنان التي ترافقت للأسف مع انفجار من اكبر الانفجارات (غير النووية) في العالم. انفجار محا معالم العاصمة التي ...